સમજાવી નથી શકતો

ગઝલમાં સૌ વિચારો મારા દર્શાવી નથી શકતો;
ઘણું સમજું છું એવું જે હું સમજાવી નથી શકતો.

ન સ્પર્શી કોઈ અવગણના કદી પણ મારા ગૌરવને,
કે હું ઉપકાર છું એવો જે યાદ આવી નથી શકતો.

ગયો ને જાય છે દુ:ખનો સમય એક જ દિલાસા પર,
કે વીતેલો સમય પાછો કદી આવી નથી શકતો.

તમે આવ્યાં હતાં પાછા જવાને તો ભલે જાઓ,
તમે મારું જીવન છો તમને થોભાવી નથી શકતો.

તમે કાલે હતાં કેવાં અને આજે થયાં કેવાં,
તમારી સાથ પણ હું તમને સરખાવી નથી શક્તો.

બહાનું કેમ શોધું હું ‘મરીઝ’ એના મિલન કાજે,
નિખાલસ છું હું તેથી વાત ઊપજાવી નથી શકતો.

- મરીઝ

સિતમ કરી ગયા

મુજ પર સિતમ કરી ગયા મારી ગઝલ ના શેર,
વાંચીને એ રહે છે બીજાના ખયાલ માં.

એ ના કહીને સહજ્ માં છટકી ગયા ‘મરીઝ’,
કરવી ના જોઇતી’તી ઉતાવળ સવાલ માં.

-મરીઝ

જાણે કે બીજી છોકરી નથી

છે  તોર  એનો એવો  કોઈની પડી  નથી 

આ  શહેરમાં જાણે કે બીજી છોકરી નથી 

અધ્ધર ઉપાડી કોઈએ સપનામાં એકવાર 

બસ ત્યારથી ધરતી ઉપર પગ મૂકતી નથી 

પ્રતિબિંબ પણ  કોઈનું એમાં હોવું જોઈએ 

એ કાચની  તકતી  જ ફકત  આરસી નથી

એ હોઠ શું જે હોઠ પર ના હોય તારું નામ

એ આંખ શું જે આંખમાં તારી છબી નથી 

એણે તેં  કેટલી તો  ફટાવી  દીધી  ’અદમ’ 

કે આ ગઝલ કોઈને હવે ગાંઠતી નથી

- અદમ ટંકારવી

તમને જોઈને મને જે થાય છે

તમને જોઈને મને જે થાય છે 

બીજા શબ્દોમાં ગઝલ કહેવાય છે 

તારા પરથી આ નજર ખસતી નથી 

ને ખસે તો ત્યાંય તું દેખાય છે 

આમ જો પૂછો તો તું સંદિગ્ધ છે 

આમ તારો અર્થ પણ સમજાય છે 

હુંય ક્યાં ક્યાં આવી શોધું છું તને 

તુંય ક્યાં ક્યાં જઈ અને સંતાય છે ?

ના થવાનું હરપળે થાતું રહે 

ને થવાનું ક્યાં કદીય થાય છે ? 

લે, હવે ચૂપચાપ તું બેસી રહે 

તું હવે ક્યાં પાંચમાં પૂછાય છે ?

થાય મારાથી શરુ પણ તે પછી 

આ કથા તારા સુધી લબંાય છે 

સૌની આંખોમાં આ એક જ પ્રશ્ન છે 

અમને મૂકીને બધાં ક્યાં જાય છે ? 

મેનકા જેવી જ ભાષા છે ‘અદમ’ 

સ્હેજ અડીએ ત્યાં તપોભંગ થાય છે

- અદમ ટંકારવી

નફા ને ખોટનો ખયાલ ન કર

નફા ને ખોટનો ખયાલ ન કર,
ફકીર સાથે ભાવતાલ ન કર.

કોક બીજું ય વસે છે અહીંયાં,
અહીંયાં તું આટલી ધમાલ ન કર.

કેમકે તું નથી તારી મિલકત,
દોસ્ત તારામાં ગોલમાલ ન કર.

તું નથી જાણતો ક્યાં જાય છે તું,
આટલી તેજ તારી ચાલ ન કર.

લોક માલિકને ભૂલી બેસે,
સંત તું એટલી કમાલ ન કર.

- અદમ ટંકારવી

હું તો માનું છું કે હું છું શાયર

હું તો  માનું છું  કે હું છું  શાયર

કિન્તુ  ડાર્લિંગ  કહે  છે : લાયર                                 

સ્હેજ અડતાં જ  શૉક લાગે  છે

લાગણી હોય છે  લાઈવવાયર                                

અર્થનો  રોડ  છે  ખાબડખૂબડ

ને વળી  ફ્લૅટ  શબ્દનું  ટાયર                                   

દૂર સહેજે નહિ તો દાઝી જઈશ

ધૅટ  ગર્લ ઈઝ  સ્પિટિંગ  ફાયર                                   

ફાસ્ટ ફૂડ  જેવી  ગઝલ  વેચું છું

કિન્તુ ક્યાં કોઈ છે અહીંયા બાયર?                                        

- અદમ ટંકારવી

નાની અમસ્તી વાતમાં અપસૅટ થઈ ગઈ

નાની અમસ્તી વાતમાં  અપસૅટ થઈ ગઈ

હમણાં સુધી જે ધિસ હતી તે ધેટ થઈ ગઈ             

અરવિંદને  ઈંગ્લૅન્ડનો  વીઝા  મળી  ગયો

ખાદીની  એક  ટોપી  પછી  હૅટ  થઈ ગઈ             

કૂતરો  આ  ફૂલફટાક તે  ડૉગી બની ગયો  

બિલ્લી  બનીઠની  ને  હવે  કૅટ  થઈ ગઈ            

ગુજરાતમાં હતી  આ  ગઝલ ગોળપાપડી

ઈંગ્લૅન્ડમાં આવી અને  ચૉકલેટ થઈ ગઈ               

હા, સ્વિટ નથિંગ્ઝ જેમ તું બોલી ગયો અદમ

ગુજલિસ કવિતા જાણે કે  ચિટ્ચૅટ થઈ ગઈ           

- અદમ ટંકારવી

અહિયા ત્યાં વહેંચાઈ છે

અહિયા ત્યાં વહેંચાઈ છે

લાગણી એન આર આઈ છે       

કોટે વળગી એ રીતે 

જાણે કે નૅકટાઈ છે        

મારી વાતમાં કેવળ યુ

તારી વાતમાં આઈ છે       

તારી લાઈફ ડિસ્કોડાન્સ

ને મારી  ભવાઈ  છે      

છોડ બ્રિટનની વાત અદમ

એ પણ વ્હાઈટ લાઈ છે

- અદમ ટંકારવી

ક્વેશ્ચન ટૅગમાં બંધાઈ ગયા

ક્વેશ્ચન ટૅગમાં બંધાઈ ગયા

વ્હાય ને વૉટમાં ખોવાઈ ગયા     

પહેલાં તો હરપળે હતા હોમસિક

ધીરે ધીરે પછી ટેવાઈ ગયા     

છોકરી સાચ્ચે ચીઝકૅક હતી

સહેજ ચાખી અને વટલાઈ ગયા      

લ્યો, પીતા થઈ ગયા હલાલ બીઅર

શેખજી કેટલા બદલાઈ ગયા      

આઈ ડોન્ટ થિન્ક યુ વિલ ઍવર સી હિમ

ભૂરી આંખોમાં એ ખોવાઈ ગયા         

થઈ ગયા આપણે કલર બ્લાઈન્ડ

આ વિલાયતથી લ્યો અંજાઈ ગયા         

પેલો ઍરો હજી છૂટ્યો જ નથી 

તે છતાં આપણે વીંધાઈ ગયા         

ચૅઈસ્ટ ઈંગ્લિશમાં થોડી વાત કરી

બોલતાં બોલતાં ગૂંચવાઈ ગયા       

આજ તો એ રીતે શી પોર્ડ ઑન મી

આખેઆખા જુઓ ભીંજાઈ ગયા       

આપણે નાઈધર હિઅર નૉર ધૅર

એક વૉઈડમાં ખોવાઈ ગયા 

લૂંટવા આવ્યા યુનાઈટેડ કિંગડમ

ને અદમ આપણે લૂંટાઈ ગયા ‍   

 - અદમ ટંકારવી

આપણું હોવુ હેંગઓવર જેવુ

શ્વાસનું ચાલવુ ચેટર જેવું, આપણું હોવુ હેંગઓવર જેવુ.

આ ખીજાવું ને રીઝાવુ તારૂં, લાગે ઈંગ્લેન્ડના વેધર જેવુ.

એક એક પળ અહીં સ્કેરી છે, વિશ્વ આખું છે હોરર જેવું.

પેન્સિલ માર્ક જેવું સ્મિત મારૂં, રૂસણું તારૂં ઈરેઝર જેવું.

કોઈનું કોન્સોલેશન છે અદમ, ક્રોકોડાઈલના ટીયર જેવું.

- અદમ ટંકારવી